Tranedans på Neskvia?


 Ein einsleg trane spankulerte majestetisk omkring på Neskvia i Hyen fredag 22. april 2005.

Vi har aldri observert trane i Hyen før, men fredag 22. april 2005 fotograferte vi denne einsame majestet roleg spankulerande omkring på Neskvia ved Heimsetvatnet i Hyen.

F.T.: Magnar Heimset

Det er ikkje så mykje som overraskar oss lenger når det gjeld endringar i flora og fauna, men trane på Neskvia fekk oss til å heve augnebryn og kamera, og telelinsa fanga inn dette sjeldne synet.

Tranen hekkar vanlevis ikkje på Vestlandet, men nord på Austlandet og i Trøndelag er det ikkje uvanleg å oppleve den karakteristiske tranedansen på opne myrar og sletter om våren.

Rekognosering
Kanskje denne tranen var ute på rekognosering for å finne eit høveleg og ledig revir her vest på? Klimaet endrar seg, Det er t.d. ikkje uvanleg å sjå flokkar av songsvaner som rastar her på veg nordover om våren og sørover om hausten. Det er vel heller ikkje utenkjeleg at vi kan få oppleve tranedans på Neskvia. Vi får berre følgje med.