i Hyen 2010 vert i tidsrommet 19. - 25. juli

Du kan laste ned Friluftshelgavisa 2010 i pdf-format (10 MB) ved å klikke på linken under. Papirutgåva kom som innstikk i Firda Tidend onsdag 14. juli. Dei som ikkje held FT og som ønskjer avisa tilsendt, kan sende ein e-post med vanleg postadresse til friluftshelga@enivest.net eller spør i sportsforretningar i Fjordane der avisa er lagt ut.

Friluftshelgavisa 2010

Tidspunktet for årets arrangement er også denne gongen lagt til veke 29, dvs. i tidsrommet måndag den 19. til søndag den 25. juli. I år startar ein allereie på måndag med jaktsti for jenter på skytebana på Å-bakkane. Tysdag er det kulturvandring frå Røyrvik til Heimseta, med tur innom gardsmuseet til Martin og Rannveig Ommedal i Heimseta. Det vert servert mat på gamleskulen i Røyrvik. Onsdag er det som vanleg nasjonalt friidrettsstemne på idrettsplassen. Torsdag går den tradisjonelle, lange fjellturen, denne gongen i Solheimsmarka. Fredag er det, som vanleg, fotballkamp på idrettsplassen og volleyballturnering på sandbana i Vikja etterpå.

Av spesielle nye innslag kan nemnast at Eli Kari Gjengedal (vêrdama på TV2) kjem og skal vere med å markere at det er 110 år sidan bestefaren hennar, forfattaren Knut Gjengedal, vart fødd.

Sjølve helga samlar naturlegvis nok mest folk. Laurdag er som vanleg den store myldredagen i sentrum med mange ulike aktivitetar som matservering, salsutstillingar med kunst- og brukskunst, program i kyrkja, triatlonkonkurranse og mykje meir. Dagen vert avslutta med flakedans til musikk av Hyen Spelemannslag.

Søndag er det tid for den tradisjonelle friluftsgudstenesta, i år på Nesholmen. Etter gudstenesta vert det selt rømegraut, kaffi og kaker. Det er fjelltur etter matserveringa, denne er i år spesielt for born i regi av Barnas Turlag i Gloppen.